فكرة يديدة لبودنج الخبز العادي تعطيه طعم و ريحة وايد حلوة و البودنج من اسهل الاطباق اللي ممكن نسويها لان بكل بساطة نحط كل شي على بعض و ندخلهم الفرن
بس من اللاشياء المهمة اللي لازم نراعيها ان الخبز او الصمون اللي نستخدمه لازم ما يكون طازج يعني يكون بايت لان يمتص السوائل احسن من الخبز الطازج
دايما عندنا فايض من الصمون بالبيت اللي ما ندري شنسوي فيه فنقدر نحوله لهالطبق الحلو
الشي الثاني ان نقدر نستبدل قطع الجبن و البسكوت اللي بالوصفة باي مكون ثاني مثل الكاكاو او المكسرات او حتى الفواكه فتقدرون تبتكرون وصفتكم الخاصة فيكم
.JPG)
بودنج الخبز بالجبن و بسكوت الزنجبيل
المقادير
١ رغيف صمون فرنسي مقطع الى مكعبات او اي نوع صمون موجود بالبيت بس يكون ابيض و سادة بدون اضافات
٤ كوب حليب سائل
١ كوب كريمة سائلة
٤ بيضات
نصف قالب زبدة مقطعة الى مربعات صغيرة
١ كوب سكر
٨ حبات جبن كيري مقطعة الى قطع صغيرة
٦ قطع بسكوت الزنجبيل و الشوفان مكسر الى كسر صغيرة
صلصة كاراميل جاهزة او محضرة في المنزل
رشة فانيليا
١/٢ ملعقة متوسطة بهارات الفطائر الحلوة او القليل من القرفة و الزنجبيل
الطريقة
يوضع الصمون المقطع في طبق بايركس و يضاف له الجبن و البسكوت
يخلط الحليب مع الكريما و البيض و السكر جيدا
تضاف الفانيليا و البهاراات
يصب الخليط على الصمون و يترك لمدة نصف ساعه
توزع الزبدة على سطح الطبق
يدخل في فرن متوسط الحرارة لمدة ٤٥ دقيقة او حتى يتحمر السطح
تخرج الصينية من الفرن و يرش السطح بالكاراميل و تقدم ساخنة او دافئة
بالعافية
No comments:
Post a Comment